हिमखबर डेस्क
हिमाचले री टोपी
शैल़ बड़ी लगदी हिमाचले री टोपी,
पश्मीना री शाॅल ऊना री कोटी।
नची ने घुमदी दइएं च मदाणी,
साफ कने सुथरा बौड़िया रा पाणी।
तिलां री चटणी तेला री घाणी,
हिमाचलियाँ गल तुसां सच्ची सुनाणी।
तुड़के लगांदे पाड़े रे बोटी,
सरवां रा साग मकिया री रोटी।
काथी दौगले कने सनणे री भुरजी,
पाणिए ने भरी डैमा री खुरजी।
सेबा रे बूटे बर्फा रे टीले,
दयारा री चूण्डी कने बदल़ नीले।
सयाल़े जो लैंदे गुच्छिया जो तोपी,
शैल़ बड़ी लगदी हिमाचले री टोपी।।
परमजीत सिंह “कोविद”
“कहलूरी”
