हमीरपुरे री बोली – प्रेषक अनिल कपलेश
हुण अंगणे च घट ही बणदियां खिंदां
कैंह कि बिस्तरे च घट ही सजदियां खिंदां
इक जमाना था ऐहि थीयां बछाण ऐहि ओढण
घरे दे मंजोल़ूये दियां शान थीयां खिंदां
कपड़ा जां कोई पराणा होंदा था
अजकले साहीं न फकोंदा न डस्टबीने च पौंदां था
संभाल़ी के सैह संदूके च रखोंदा था
खिंदां खंदोल़ुए दे कम्मे औंदा था
पैहल़े कपड़े दीया सियाईया उधेड़ी न्योल़ू बणदा था
फिरी न्योल़ूये पर न्योल़ूये दा तॉ चढ़दा था
फोटुये जिह्यां लुब्बा दा तिह्यां नाप नपाई होंदी थी
बड़ीया मेहनता बाद खिंद सूतें औंदे थी
जणासां चाएं चाएं निगड़े बांदियां थियां
कई तां बणांदे बणांदे गीत भि गांदीयां थीयां
चलदिया खंदुईया सुईया नै गप्प चलदी थी
ढलदिया धुप्पा तक खिंद बणदी थी
फिरी पेटिया पर या ओबरिया डंडे (विलंगा)पर रखोंदी थी
स्याल़े दे बेल़ें बड़ी कम्मे औंदी थी
थल्लैं ता बारह म्हीने बछांदे थे
कदी पराणेयां कपड़ेयां दिक्खी पराणी गप्प लांदे थे
खिंदां दे निग्घे दा था अपणा ही मज़ा
पर बदलया वक्त आये रजाई गद्दा
खिंदां दा रुआज घट होईया
पराणा कपड़ा भी वचारा होईया
हुण सैह कदी बैड बक्सेयां च पौंदा
कदी तांह कदी तांह रखोंदा
अजकले दे जमाने कुसी जो नीं दयोंदा
पर नीं था ऐसा जदूं बणदीयां थीयां खिंदा
बछाणे ओढणे दीयां लग लग खिंदां
अच्छा खंदोल़ुए दी भी अपणी कहाणी है
हर बच्चे दे बिस्तरे दी एह नशाणी है
बच्चे जाहलू तूणे-मूणे होंदे
सूसू करी नैं बड़े रौंदे
तां खंदोलू बड़ा कम्मे औंदा
हमेशा मोमजामे पर रखोंदा
बच्चा सारी रात मजे.नैं सोंदा
खंदोल़ुए दा साईज खिंदा ते इक चौथाई -तिहाई होंदा
बच्चे जो इंन्फेक्शन भि नीं होंदा
ग्राएं च खिंद खंदोलू रोज बरतोंदे
ओढदे भी कनै खिंद खंदैलू गद्दे कने भी बछोंदे
कुथी कुथी एह हुण भी बणदे
काल़े म्हीणे ते बाद मिठ्ठियां धुप्पां मिठ्ठियां ठंडा.दा टैम इन्हां दा
नजरी ओंदा दे देया नज़ारा जिह्यां फोटुये च न्योल़ू सजा दा
खैर हुण घट ही नज़री औंदीयां खिं दां
पेटिया, विलंगा ,संदूके च घट ही रखोंदियां खिंदा ।
